Gjatë qëndrimit në Estoni, zëvendësministri i Punëve të Jashtme dhe Diasporës,  Kreshnik Ahmeti, ka zhvilluar takime në Ministrinë e Punëve të Jashtme dhe në Parlamentin estonez.

Në takimin e parë, zëvendësministri Ahmeti, është pritur nga Nënsekretarja e Shtetit, znj. Minna-Liina Lind.

Përmes një komunikate për media nga MPJD-së, bëhet e ditur se në takim u diskutua për marrëdhëniet e shkëlqyera dypalëshe dhe mundësitë për thellimin e tyre, përcjell Arbresh.info.

Po ashtu, u bisedua për procesin e anëtarësimit të Kosovës në organizata ndërkombëtare. Me këtë rast, Ahmeti, falënderoi Nënsekretaren Lind, për mbështetjen e Estonisë në Këshillin e Evropës dhe në Bashkimin Evropian.

Tema të tjera që u diskutuan ishin zhvillimet rajonale si dhe agresioni i paprovokuar i Federatës Ruse ndaj Ukrainës dhe ndikimi që ka pasur kjo tek të dyja vendet.

Ndërsa, në Parlamentin estonez u prit nga deputeti, Kristi Enn Vaga, njëherit anëtarë i Komisionit për Çështje të Bashkimit Evropian.

Në kuadër të këtij takimi u bisedua, për zhvillimet e fundit në të dyja vendet dhe bashkëpunimin e shkëlqyer.

Vaga, njoftoi që brenda muajit do të krijohet Grupi i Miqësisë mes Parlamentit të Estonisë dhe atij të Kosovës.

Ai theksoi se Estonia do të vazhdojë ta mbështesë Kosovën, veçanërisht me përvojën e saj në fushën e digjitalizimit.

Ahmeti e falenderoi z.Vaga për mbështetjen e vazhdueshme që ka ofruar Estonia për shtetin tonë./Arbresh.info